Author name: admin

Shirkaan oo ay soo qabanqaabisay Wasaaradda Deegaanka, Daaqa iyo Isbedelka Cimilada Dowladda Puntland ayaa si rasmi ah waxaa u daahfuray Madaxweyne ku xigeenka Dowladda Puntland, Mudane Ilyaas Cismaan Lugatoor. Shirkan oo ah mid sanadle ah ayaa diiradda lagu saaray arrimaha ku saabsan ilaalinta deegaanka, wax ka qabashada isbeddelka cimilada, iyo sidii loo hormarin lahaa bilicda magaalooyinka Puntland. Shirka waxaa ka soo qaybgalay dhammaan daneeyayaasha muhiimka ah ee arrimaha deegaanka, kuwaas oo ay ka mid yihiin Maamulka Gobollada, qaar ka mid ah Guddoomiyeyaasha Degmooyinka Puntland, iyo xubnaha goleyaasha kala duwan ee Dowladda Puntland. Waxa kale oo shirka ka qaybqaatay khubaro iyo ururo ku shaqo leh ilaalinta deegaanka kuwaas oo talooyin muhiim ah ku soo biiriyey ajendaha shirka. Intii uu socday shirkan, waxaa si gaar ah loogu falanqeeyey doorka muhiimka ah ee ay bulshada ku leedahay ilaalinta deegaanka iyo la dagaallanka isbeddelka cimilada, gaar ahaan xaaladaha sii xumaanaya ee laga dareemayo deegaanka Puntland. Qodobada shirka ayaa sidoo kale lagu xusay caqabadaha hadda jira, sida kororka qashinka magaalooyinka, xaalufinta dhirta, iyo saameynta ka dhalata adeegyada qashin ururinta oo aan weli si buuxda loo hagaajin. Wasiirka Wasaaradda Arrimaha Gudaha, Federaalka iyo Dimuqraadiyeynta Dowladda Puntland, Mudane Cabdi Faarax Siciid Juxa, oo kalmad muhiim ah ka jeediyey shirka 6-aad ee Arrimaha Deegaanka, ayaa uga mahadceliyey Wasaaradda Deegaanka, Daaqa iyo Isbedelka Cimilada shaqada ay qabteen iyo sida ay uga go’an tahay inay wax ka qabtaan dhibaatooyinka deegaanka ee gobolka. Wasiirka ayaa ku adkeeyey Maamulada Gobollada iyo Degmooyinka Puntland in ay si dhow uga shaqeeyaan ilaalinta bilicda iyo nadaafada magaalooyinka, taas oo kaalin weyn ka qaadanaysa yareynta saameynta taban ee isbeddelka cimilada. Sidoo kale, Wasiirka ayaa shacabka kula dardaarmay in ay doorkooda ka qaataan ilaalinta deegaanka. Wuxuu xusay in bulshada looga baahan yahay in ay si wadajir ah uga shaqeeyaan xakameynta qashinka iyo in ay iska ilaaliyaan wax kasta oo waxyeelo u geysan kara deegaanka, sida isticmaalka aan xakamayn lahayn ee bacaha iyo xaalufinta dhirta. Wasiirka ayaa sidoo kale sheegay in dowladdu diyaar u tahay inay taageerto dadaallada lagu hormarinayo bilicda magaalooyinka, iyadoo la hirgelinayo barnaamijyo ku salaysan wacyigelin bulshada iyo dhiirrigelinta adeegyada nadaafadda. Intii uu shirku socday, waxaa sidoo kale lagu soo bandhigay qorshayaal cusub oo ku saabsan sidii wax looga qaban lahaa isbeddelka cimilada oo saameyn weyn ku leh nolosha dadka iyo deegaanka Puntland. Wasaaradda Deegaanka ayaa soo jeedisay qorshooyin horumarineed oo ku saabsan sidii loo yarayn lahaa saameynta roob yarida iyo abaaraha, kuwaas oo si gaar ah u taabanaya bulshooyinka miyiga ah. Shirka ayaa sidoo kale diiradda lagu saaray sidii loo dhiirrigelin lahaa iskaashiga u dhexeeya dowladda, ururrada bulshada rayidka ah, iyo hay’adaha caalamiga ah si loo gaaro ujeeddooyinka la xiriira horumarinta iyo ilaalinta deegaanka Puntland. Khubarada iyo daneeyayaasha shirka ka qaybgalay ayaa si wadajir ah u soo bandhigay talooyin wax ku ool ah oo loogu talagalay in lagu xoojiyo dadaallada lagu ilaalinayo deegaanka iyo wax ka qabashada saameynta isbeddelka cimilada. Ugu dambayn, Wasiirka Wasaaradda Arrimaha Gudaha ayaa ugu baaqay dhammaan maamullada gobolka iyo shacabka Puntland in ay si wadajir ah uga shaqeeyaan ilaalinta deegaanka. Wuxuu carabka ku adkeeyey in nadaafada magaalooyinka iyo ilaalinta bilicda ay muhiim u yihiin caafimaadka bulshada iyo horumarka guud ee Puntland. Wasiirka ayaa sheegay in dowladdu ay ka go’an tahay inay sii waddo taageerada ku aaddan barnaamijyada deegaanka si loo xaqiijiyo mustaqbal ka wanaagsan Puntland oo cagaaran. Shirkan oo ahaa kii 6-aad ee noociisa ah ayaa la filayaa in uu dhiirrigeliyo dadaallada socda iyo kuwa mustaqbalka ee lagu horumarinayo nadaafadda magaalooyinka iyo ilaalinta deegaanka Puntland. Dhammaan talooyinka iyo go’aannada shirka ka soo baxay ayaa noqon doona kuwo lagu dhaqangeliyo dhammaan gobollada iyo degmooyinka Puntland, iyadoo diiradda la saarayo ilaalinta deegaanka iyo wax ka qabashada caqabadaha isbeddelka cimilada. “kadaalaco sawirada linkigan hoose https://www.facebook.com/share/p/WvRW3oY6yEJKdYUN/”