Qardho: July 15, 2025: Wasiir ku xigeenka Wasaaradda Arrimaha Gudaha, Federaalka iyo Dimuqraadiyeynta Dawladda Puntland Mudane H.E Abdirahman Khaliif Faarah oo uu weheliyo KS Agaasimaha Waaxda Dowladaha Hoose ee Wasaaradda Arrimaha Gudaha DPL Abshir Hassan Mohamed ayaa ka qaybgalay daahfuray Kalfadhiga 38-aad ee Golaha Deegaanka Degmada Qardho.

Munaasabadda furitaanka kalfadhigan ayaa waxaa ka qaybgalay Xildhibaan Maxamuud Cali Gooni oo ka mid ah Golaha Wakiiladda Dawladda Puntland, Guddoomiyaha Gobolka Karkaar Cabdi Siciid Cismaan, Guddoomiye ku xigeenka Gobolka, Taliyaha Qaybta Booliska Gobolka Karkaar, Duqa Degmada Qardho Mudane Cabdulqaadir Siciid Qaal iyo ku xigeenkiisa Maxamed Cabdullaahi Siciid, xubnaha Golaha deegaanka Degmada, iyo marti sharaf kale oo ka kooban Golaha Wakiillada Dawladda Puntland.

Wasiir ku-xigeenku waxa uu ku bogaadiyay golaha deegaanka Qardho hawlaha ay u hayaan bulshada, isagoo xusay in golayaashu ay yihiin tiir muhiim u ah geeddi-socodka dimuqraadiyadda iyo maamul-wanaagga.

Guddoomiyaha Golaha Deegaanka ahna Duqa Degmada Qardho oo khudbad ka jeediyey ayaa soo bandhigay arrimo muhiim ah oo la xiriira horumarinta adeegyada bulshada, xoojinta nabadgelyada, iyo kor u qaadidda daahfurnaanta iyo isla xisaabtanka hay’adaha deegaanka.

Ugu dambeyntii Wasiir ku-xigeenka oo soo xiray munaasadda ayaa adkeeyey sida ay muhiim u tahay in la joogteeyo kalfadhiyada golayaasha deegaanka si looga wada-tashado qorsheyaasha horumarineed.

Sido kale, Wasiir ku-xigeenka ayaa ku dhiirrigeliyay golaha in ay sii laba-jibaaraan shaqadooda, ayna bulshada la shaqeeyaan si loo gaaro horumar waara oo la taaban karo.

▪︎▪︎▪︎DHAMMAAD▪︎▪︎▪︎